کوتره اسبه بال (کبوتر سفید بال)
مه دله غم دپیته غم دپیته
إفرادار بیمه و بهیمه پیته
إفرادار بیمه و بشکسه چله
غرصه سیو چادر بزو مه دل دله
غرصه غرصه غرصه خروار به خروار
غرصه إنه إنه قطار به قطار
بورم صحرا بورم جنگل بورم دشت
پسره بورده راه ره بزنم گشت
آهای مزیره مرد،چی کار هاکردی
مه ره سر بیشتی و تینار هاکردی
دو ساله بوردی و دیگر نموئی
پاره بیه منه جیگر نموئی
چند ساله راه دارمه تا ته دگردی
دست به دعا دارمه تا ته دگردی
مره بکوشته ته چشم انتظاری
رفاقت این تیه بوری تیناری؟
در که صداکنه گمبه بیموئی
ته مار دعا کنه گمبه بیموئی
ته ماره برمه واره کور هاکرده
ونه دله ته داغ ناسور هاکرده
مه دست و مه دل و صدا بمرده
برمه نکمه،مه دل باد بکرده
شه مزیره ریکای دوربگردم
نومزه گیره ریکای دور بگردم
ته تازه نوج بزه ریشه بلاره
ته رج دره مه سرپیشه بلاره
شه می ره چم دایی ته دور بگردم
غرصه ره رم دایی ته دوربگردم
أشون ته عکسه می ره چم هادامه
ته عکسه شیشه ره شبنم هادامه
دل ره خربزه واری قاچ هادامه
تا قد داشتمه عکسه ماچ هادامه
امسال ننی کر ره کوفا هاکنی
بینجه هپاچی و سما هاکنی
إمسال ننی تره داماد هاکنم
دوست و رفیقونه دلشاد هاکنم
دامادی رخت ره هر روز بو کشمبه
ورمه وره بازار اتو کشمبه
پنج شنبه نماشون مه گس کفنه
غرصه ورگ وونه و مره لفنه
شومبه مزار ته ره پیدانکمه
دله قرار تره پیدانکمه
بورم جبهه سنگر به سنگره بگردم
داد بکشم پسر پسر بگردم
اینجه جنگه اینجه خون و تفنگه
اینجه جنگه اینجه شونگ و شونگه
مه سر تیر و تفنگ ، مه سرگلیله
اینجه خون روش بیته کیله به کیله
اینتا لینگ کنه شه چه راه نشونه
صاحاب کوبه ونه همراه نشونه
اینتا دست کنه شه که دم هادائه
حلقه دارنه گمونم نو زوماهه
کوتر إسپه بال ته ره ندیمه
بیمومه ته دنبال ته ره ندیمه
گننه ته ره اروند او بورده
گننه ته ره کوسه ماهی بخرده
گننه تانکه زنجیره بن، راستیه؟
دشمن توپ و تیره بن ، راستیه ؟
مسلمانون مسمانون ، مه سینه
مه دل که دل نیه، کینوئه کینه
مه ره تور بزه چو هاکرده دشمن
کوتره پر پتو هاکرده دشمن
مه سره تش دچینه من شه دومبه
مه کوتره پر بچینه من شه دومبه
مه صدا لو نینه چه چی بهووم
مه چشم سو نینه چه چی بهووم
ته پوتین و پلاک ره راضی بیمه
تنه بپیسه ساک ره راضی بیمه
ته هسکائه جا مه دل رضائه
دل ره راضی کمبه ته هسکائه
شعر از استاد علی حسن نژاد
مطالب مشابه :
همایش ملي دستاوردهاي نوين علمي در تربيت‌بدني و علوم ورزشي
و دستاوردهاي علمی و تجارب کاربردي در علوم ورزشی، معاونت سما دانشگاه
کوتره اسبه بال (کبوتر سفید بال)
مجمع اتوییهای مقیم قایمشهر . اتو درسکوت . روستای ولیلا . سایت روستای لاجیم . بینجه هپاچی و
برچسب :
سما قایمشهر