ژاک پره وردن بیر شعر

ژاک پره وردن بیر شعر

تورکجه یه چئویرن: مقصود تقی زاده هریس(نیسگیل)

 

بو سئوگی

 

بو سئوگی

           بو قده ر برک

بو سئوگی

          بو قده ر یومشاق

بو سئوگی

          بو قده ر اینجه

بو سئوگی

          بو قده ر قالین

          بو قده ر نایمید.

 

بو سئوگی

          بو قده ر گؤزل

                          گوندوز کیمی.

زمانه نین پیس لی یینده، آغیرلیغیندا

                         بو سئوگی بو قده ر پیس.

بو سئوگی

          بو قده ر گئرچک

بو سئوگی

   بو گؤزللیکده، بئله اوغورلو، بئله شاد

بو سئوگی

         بو قده ر گولونج

                 قارانلیقدان قورخان اوشاقلار کیمی

                                                    تیتره ین، اسن.

بو سئوگی

           بو قده ر اؤزونه باغلی

                            گئجه نین قوینوندا

                                 آستاجا آددیملایان بیر کیشی تک

                                                                ائهمال، دینج.

بو سئوگی

          یادلاری قورخودان

اونلاری دیله گتیره ن، دانیشدیران

                       رنگ لرینی آتدیران.

بو سئوگی

       بو قده ر اورکک- اونا تله قوران بیزیک-

بو سئوگی

        بو قده ر یارالی، بو قده ر ازیلمیش

                                    بو قده ر اوزولموش

                                بو قده ر توکنمیش

                                بو قده ر اونودولموش

                                         - اونو یارالایان بیزیک

                                                اونو اوزه ن، اونو ازه ن

                                                         توکه دن، اونودان بیزیک-

بو سئوگی بو قده ر اجه ر،

بو قده ر دیری

گونش کیمی پاریلدایان

                   سنین دیر و منیمدیر.

هئچ زامان دییشیلمه ین

                   بو سئوگی

                        بیر بیتگی تک دوغرودور.

بیر قوش کیمی چالیقلایان

بیر یای کیمی ایستی دیر.

 

بیز ایکیمیز

کؤچوب قاییدا بیله ریک،

اونودوب دا یوخلایا بیله ریک،

اویانیب دا درد چکیب، قوجالا بیله ریک

یئنی دن یوخلاییب

              اؤلوم یوخوسو دا گؤره بیله ریک.

بیر ده اویانیب،

بیر ده یوخلاییب

بیر ده گولوب

گنج لییه قاییدا بیله ریک.

آنجاق سئوگیمیز قالار

               عینادکار و دوشونجه سیز بیری کیمی.

ایستک لریمیز کیمی

                        جانلی، دیری.

خاطیره لر تک رحیمسیز

حسرت کیمی دلی- دولو

آغیرلامالار قده ر مهربان

مرمر داشی کیمی سویوق

گوندوز کیمی گؤزل، قشنگ

اوشاقلار تک یومشاق، اینجه.

 

باخیر بیزه گولومسه یه رک

دانیشیر بیزله

سس سیز- سمیرسیز.

بیز اونو دینله ییریک

                       تیتره یه رک!

اونو سسله ییریک،هارایلاییریق

سن اوچون

اؤزوموزچون،

سن اوچون و من اوچون.

یاپیشیریق اته ییندن

            زاریلدایاراق:

                          قال،

                             دوردوغون یئرده قال!

قال اؤنجه کی یئرینده!

ده به ریلمه

             گئتمه، قال!

بیز وورغونلار سنی اونوتمامیشیق

سن ده اونوتما بیزی

دونیادا سندن باشقا

                بیر کیمسه میز یوخدو، قال!

قویما بوزا دؤنه ک بیز

هر گون هر هارادان سا

یاشاماقدان بیزه بیر ایز گؤستر، قال!

بئواخت سا دا

              خاطیره لر مئشه سینین باغریندان

تاپیل بیردن، چیخ بیردن،

الینی اوزات

            بیزی قورتار...


مطالب مشابه :


ژاک پره وردن بیر شعر

یاشیل خیال - ژاک پره وردن بیر شعر - شعر، داستان،مقاله، نقد، فولکلور و - یاشیل خیال




گوله- گوله/ترجمه شعر بدرود از مجموعه هوای تازه (احمد شاملو)

یاشیل خیال - گوله- گوله/ترجمه شعر بدرود از مجموعه هوای تازه (احمد شاملو) - شعر، داستان،مقاله




حسرت/رامیز روشن

یاشیل خیال - حسرت/رامیز روشن - شعر، داستان،مقاله، نقد، فولکلور و - یاشیل خیال




قیسا شعرلر/مقصود تقی زاده هریس(نیسگیل)

یاشیل خیال - قیسا شعرلر/مقصود تقی زاده هریس(نیسگیل) - شعر، داستان،مقاله، نقد، فولکلور و




آتا شعری«تقدیم اولور بابک اسلامی جنابلارینا»

یاشیل خیال(نیسگیل) امیدعلی شیخی(شاعر -مدرس دانشگاه) rss . powered by blogfa.com




حسین منزوی -نین "دومان" اثری

همان زماندا، من ده "یاشیل خیال" عنوانیندا تورک صفحه لری نین دولاندیرانی کیمی چالیشیردیم.




برچسب :