اوستاد بارز دن یاسلی ساوالان شعری
هر زامانکی باخیرام باشینا قاروار گؤرورم
اوغلو اؤلموش آنا تك گؤزلرین آغلار گؤرورم
هر طرفدن چكیلیب سینه‌وه داغلار گؤرورم
آی آلان اوستونو غم چیسگینی، هر یانی دومان
آی یاغان باشینا غملر اودو، یاسلی ساوالان
گؤرموشوك یازدا كؤچكلرده چیچكلر آچیلار
هر طرفدن چیمنین سینه سینه گول ساچیلار
ماهنیلار قوشماغا باشلار یئنه ده قوشماچیلار
یاز گلیب گئتدی یئنه گولمه دین اوچ آیدا بیر آن
آی یاغان باشینا غملر اودو، یاسلی ساوالان
قرنیلر كئچدی سنین گولمه دی بیر لحظه اوزون
قانلی یاش تؤكدو سارالمیش اوزونه یاشلی گؤزون
غصّهدن دؤندو قارانلیق گئجه اولدو گونوزون
نه سوران حالینی اولدو نه وئرن جیسمیوه جان
آی یاغان باشینا غملر اودو، یاسلی ساوالان
آند وئررم سنی او قانه بلنمیش داشیوا
گئجه-گوندوز او گؤزوندن تؤكولن قان یاشیوا
اورگین دردینی بیلدیر او «سهند» قارداشیوا
سنی وارلیق- سنی تانری- سنی بو آه و فغان
آی یاغان باشینا غملر اودو، یاسلی ساوالان
سالارام یادیما بیر لحظه او كئچمیشلریوی
تؤكولن سنگ جفائیله او دورر دیشلریوی
ایزلرم بیر بیر او حئیرت یارادان ایشلریوی
هامیدان من سنین احوالینا آرتیق نیگران
آی یاغان باشینا غملر اودو، یاسلی ساوالان
ساكیت اول، آغلاما قوی بیرجه چكیلسین بو دومان
گون چیخیب ظولمتی بیر یوللوقا قووسون بورادان
«نبی» گلسین، بوز آت اولسون یئنه داغلار آتیلان
«هجر»ین بلكه ییغیلسین گؤزو یولدان، آناجان
آی یاغان باشینا غملر اودو، یاسلی ساوالان
سؤندوره بیلمهدی گؤز یاشین اوركدن اودووی
چاغیریم قوی كؤمك ائتسین سنه اؤز اؤولادیوی
افتخاریله بوگون ذیكر ائدهرم پاك آدیوی
مرد اوغوللار بئجریب خلقه وئرن شؤهرت و شأن
آی یاغان باشینا غملر اودو، یاسلی ساوالان
«بابكین»گئتدی سه بوش قالمادی آمما قوجاغین
دولودورمین ائله اوغلانلاریلا هر بوجاغین
نه قد‌ریئل اسه طوفان قوپا سؤنمز اوجاغین
ای بلالر سپری، خالقا یامان گونده آمان
آی یاغان باشینا غملر اودو، یاسلی ساوالان
چنلی بئلده «دهلیلر» قوی یئنه قورسون بوساطی
قوچ كوراوغلو یئنه جولانه گتیرسین قیرآتی
هئچ زامان اصلین ایتیرمز او كی دوزگوندو ذاتی
آند اولا آدیوا، آی گؤزلری آغلار- یاشی قان
آی یاغان باشینا غملر اودو، یاسلی ساوالان
سن دؤیوشلرده بیر آسلان كیمی دوردون آیاغا
اوخ آتیلدیقجا بیزه سینه نی وئردین قاباغا
غم یئمكدن داها جانیم یئتیشبدیر دوداغا
نه یامان گونلره گؤر قالدی بو احساسلی بالان
آی یاغان باشینا غملر اودو، یاسلی ساوالان
بابالاردان بیزه قالمیش بو مثل هاممی بیلیر
سو گلن آرخا دئییبلر یئنه بیرگون سو گلر
فلكین داش اورگین آه اوخو آخیردا دَلر
«بارز» اوغلوندا یئتر سئودیگی یاره او زامان
آی یاغان باشینا غمللر اودو، یاسلی ساوالان...
مطالب مشابه :
«نظریه ی گاستون باشلار درباره ی جوهر تخیل در ادبیات»
گاستون باشلار (1) 1962-1884 در عین حال ادیب و فیلسوف و دانشمند بود ، اما سخن ما . تنها در باب
ساوالان
ماهنيلار قوشماغا باشلار يئنه ده
قزیل باش لار
قــــــــــــــــیـزیل باش لار تاریخ ده بلله نیلی شینه گورا ، صفوی لردورینده ( قزیل باشلار
اوستاد بارز دن یاسلی ساوالان شعری
ماهنیلار قوشماغا باشلار یئنه ده
یاسلی ساوالان ...
ماهنی لار قوشماغا باشلار یئنه ده قوشماچیلار یاز گلیب
آذربايجاندا باهار بايرامي
گنچ اوگلانلانلارين تونقال قاليياراق آلوولانديرماسي ايلئ باشلار .
برچسب :
باشلار