احوالات حضرت زهرا (مرحوم حاج حيدر خوندل)
گوگل تصوّر ایدنده کمال انسانی
ایدر نظرده مجسّم جمال زهرانی
بشر قیافه سی مشهود اولور جمالندان
ولی بو بحث اوزی بیر ماجرادی طولانی
سرشتی نوریدی یوخ بلکه نوریدن اعلا
اولوبدی نور بتولیله نور نورانی
بشرده اولسا اگر سیرتاً نه سرّدی بس
حسینه قابله حق گوندروبدی لعیانی
دیسم که حوریدی بیر کسر شان اولور خانما
ایدر بو مطلبی روشن قیامت عنوانی
گلنده محشره معلوم اولار جلالی ندور
دوتار کنارینی مینلرله حور رضوانی
نه فاطمه نجه زهرا قصوری وار قلمون
محالیدور که ایده قطره شرح دریانی
او عقل کلّ که اشرفدی آفرینشدن
دیردی بو خانما کلمه ی فداهانی
گر اولماسیدی علینون وجودی خلقتده
بطوله کُفو تاپولمازدی واردی برهانی
علینون عمری فراز و نشیبیله دولودی
امام باشه ویروب بیر حیات طولانی
یازولّا باغ فدکدن گلنده بیر گون علی
که ایشلمیشدی یورولموشدی شیر یزدانی
او احتیاج که آرامشه واریدی گوروب
جمیله بیر خانمون صورتینده دنیانی
خیال خامیله آرایش تمامیله
دوتوبدی رهگذر پاک مرد تقوانی
او نوعیله که ارائه ویروب اوزون بلکه
فریب دامینه سالسون علیّ اعلانی
بو نیّتیله آیرسون علینی زهرادن
سرای درد و غم ایتسون او مهد عرفانی
او رادمرد الهی او هیکل توحید
نجه اولور اولا پابند نفس شیطانی
علی تانوردی اونی اوچ طلاق ویرمیشدی
محالیدور اولا بیرده رجوعون امکانی
امام باخدی گلوب موجه خشم دریاسی
غضبلنوب او ولیّ خدای سبحانی
عتابیله دیدی ای بی حیا، علی ویرمز
تمام عالمه بیر تار موی زهرانی
بیر آیری مطلبه فکریم گینه اولور معطوف
بو ماجرادی تداعی ایدن او معنانی
سوروشدی بیر نفر آقا تمام عمرونده
او هانسی گوندی که گوردون سرور و شادانی
تبسّمیله بویوردی امام او گونکه منی
آلوب ال اوسته رسول خدای رحمانی
بویوردی هر کسه اُولا بنفس مولایم
بودور ولی منه مولای عالی و دانی
نه قدری شادیدیم ا… بولور او ساعتده
وصایتین منه ایتدی رسول ارزانی
او گونده خلق منه بیعت ایتدیلر، افسوس
دوامی اولمادی سندیردیلار او پیمانی
ایکیمجی دفعه سوروشدی آقا سنه قربان
تفضّلاً منه کشف ایت بو سرّ پنهانی
او هانسی گوندی که چوخ غصّه لیدون عمرونده
بو کهنه دهریده گوردون غم فراوانی
امام آغلادی یا چوخ شکسته حالیله
بویوردی گَل سنه حلّ ایلیوم معمّانی
او گونکه بیعت آدیله توکولدولر ایویمه
رعایت ایتمدی شرط امانتی ثانی
او حمله ده نلر اولدی صراحتاً دیمرم
او حمله سالدی ایاقدان بتول عذرانی
چکردیلر منی جبریله مسجده اشرار
گورن ایدردی تعجّب او شور و غوغانی
او ظلم فاحشه ویرمیشدیلر قیافه ی دین
ثواب بولدوله آل رسوله ایذانی
یهودی باخدی دیدی لا اله الّا ا…
اسیر ایدن ندی روباهه شیر غرّانی
همان علیدی بو امّت بیله اسیر آپارور
که عمرو و مرحبین ایتدی حیاتینی فانی
جواب ویردیلر پیغمبر امر ایدوب صبره
بو شیرین اللرینی باغلیوب او فرمانی
قبول ایدوب که قلج چکمه سون به خاطر دین
شریعتین اولا تا حافظ و نگهبانی
او سخت منظره بیگانیه موثّر اولوب
یتوب حقیقته ایتدی قبول قرآنی
بیر آیری مطلبه بو ماجرا حکایت ایدر
هدایتین بودی اهل ولایه میزانی
او لحظه لر که وقاحتله شرمسیز امّت
کشان کشان آپاروردی او شاه والانی
هامی باخاردی ولی اعتراض ایدنمزدی
ایدردیلر ایله بیر صحنیه تماشانی
باخانلاریله باخاردی مهاجر و انصار
ایدوب او مرحله مشغول فکر سلمانی
بولنمورم نه خطور ایلدی خیالیندن
او لحظه نور ولایت تاپوب تجلّانی
بویوردی فکریوی مشغول ایلمه سلمان
مباد ایلیه سن خدشه دار ایمانی
نه قدرتیم آزالوب وار نه وحشتیم امّا
بو صبر و حوصله نون وار جداله رُجحانی
مقام سِلم و رضادور دگل مقام ستیز
اوزون که یاخشی تانورسان مقام مولانی
بو امتحان اِلهیدی صبره محکومم
گرک دوزوب دایانام ایتمیم تقلّانی
خلاصه مطلبی طول ایلماق دگل منظور
غرض بودور یتورم آخِره بو طغرانی
او کشمکش لر اولوب علّت وفات بتول
چکوبدی بستر مرگه او ماه سیمانی
فریضه دن صورا هر گون دیردی یا ا…
یورولموشام منه خوشور بو عمر پایانی
عنایت ایله خدایا وفاتیمی یاخون ایت
جهانی نیلورم ای عالمین جهانبانی
دعای فاطمه اولدی اجابته مقرون
او وقت اولوب قویا تک شهریار خوبانی
امام روضه ی پیغمبره مشرّفیدی
ایدردی حمد و ثنای خدای یکتانی
خبر گتوردوله زهرانی یا علی درک ایت
یاخوندی درک ایده سن ابتلای هجرانی
فراق فاطمه نه قدری سختیمیش ایوای
بولر فراقه گرفتار اولان بو ایمانی
علی که یخمادی دوخسان یارا اُحدده اونی
طواف ایدردی چو پروانه شمع سوزانی
ایشیتدی حالینی زهرانین ایستدی دورسون
بوکولدی دیزلری یخدی او شیر هیجانی
دوباره دوردی ایاقه کمال یاسیله
امام عزم ایلیوب دودمان والانی
گلوب نه گوردی که زهرانی رو به قبله یاتوب
چکوب غروبه جفا ابری ماه تابانی
سولوبدی عارض گُل فامی بیر ساری گل تک
جمالینه داغیلوب زلف عنبر افشانی
نه حسّ نه حرکت وار او ماه سیماده
او حالی غارت ایدور طاقت و شکیبانی
نه دللریله دانشدی بولنمورم نه دیدی
خلاصه گتدی بیانه او دخت طاهانی
گوز آچدی باخدی دیدی یا اباالحسن گلدون
فدا قدملریوه اهل عالمین جانی
منه کمال محبّتدی گر قبول ایده سن
که جابجا ایده سن ایتدوقوم وصایانی
سوزوم گر اولسا اذیّت سنه رضا دگولم
من ایتمرم سنه تکلیف بو تقاضانی
بویور دیسونله عم اوغلوم زبیر گلسون تا
دیوم اونا ندی منظوریم ای وفا کانی
بویوردی فاطمه یوخ ایله اوز وصیّتیوی
نه اولسا مقصدون اولماز قصور و نقصانی
تبسّمیله دیدی ایمدی که قبول ایلدون
منیم بو عرضیمی ای شهر عشق سلطانی
جهاندا هر کیشی لازمدی همسری اولسون
که خانه سی اولا تا همسریله نورانی
سنی اولاردام عم اوغلی آییرمارام هرگز
بتوله لطف ایله ردّ ایتمه بو تمنّانی
عم اوغلی جان ایله بیر همسر انتخاب ایله
اصیل اولا، اولا داری خوی انسانی
یتیم بالالاریما مهربان اولا من تک
بو غنچه گللریمون سولمیا گلستانی
علاوه غم گونی غمخوار اولا سنون اوزیوه
صفاسی ایلیه معمور قلب ویرانی
نه قدری فرصت اولا آغلا نوحه یاز «خوندل»
خانمدی فاطمه ایتسون نوال و احسانی
حضور انور مولایه ایله عرض ادب
گر اولسا ران ملخ شاد ایدر سلیماني
مطالب مشابه :
شهادت اصحاب
آن رادمرد با هيبت پيامبر، قلبى استوار و بى هراس به من ثواب آخرت و سراى جاويد، عطا كن )).
تسلیت شروع ایام فاطمیه و سالروز شهادت حضرت زهرا (ع)
آن کوثر حق که عطا کرده علی رادمرد
احوالات حضرت زهرا (مرحوم حاج حيدر خوندل)
به ما نیرویی عطا فرمایند تا بتوانیم به مقابله با دشمنان و او رادمرد الهی او
سلام بر مولد و ميلاد مولا(ع)
صدف بیت الله الحرام، رخشا ن ترین گوهر کائنات را به خلقت عطا رادمرد میدان عباد
حضرت حر ابن ریاحی
سلام شهیدان بر آن رادمرد. مرا اوست شمع دل و مشمول عطا و کرمِ مادرِ
درباره روز معلم
معلم نامگذاری شده است تا همواره و همه ساله ضمن بزرگداشت خاطره آن رادمرد عطا کن آنچه که
سالروز شهادت حضرت زهرا (ع)
آن کوثر حق که عطا کرده علی رادمرد
برچسب :
عطا رادمرد