الشاعرهادی الامغیطی(البوغبیش)ابوذيات

شي ناس التغير   اوجوه شيلان

واگل بسماتي من اشفاي شيلان

اليبس حلگي ابكثر منخاه شيلان

شعول   عل   يخيب اظنون ليه
***

اگل باب اليسر   ليه مرحتل

عسر مرني و لا ريجي مرحتل

ينشدوني الخلگ تمرح مرحتل

فرح و الفرح   يلطم   عليه
***

علگ بلشمس حچيك وشره

وشارك كل عگل فاهم وشره

لئن خيره البشر خصه وشره

يعم وايخلف اعلي الناس اذيه
***

يفاس ا هل الغدر وياك حطبل

شجرعمري واصير اعليك حطبل

النزل حسبة نزيل اليوم حطبل

سلف وايطالب اعلي الچان ليه
***

امسايس ساعا وي وكتي سعاتل

وذبهه امن الحزن فوگي سعاتل

سعي الصاحب لچن أخر سعاتل

عگب ما چانو ايغسلون بيه
***

علن حربه الوكت   وارفع لواعلاي

وتعنه وجايب اببعبته لواعلاي

حرت هل صاحبي اويايه لواعلاي

واذا    انخاه ايظل   سداد فيه
***

اتل دلواي بس ما شوف بدلاي

يجي غير البله و ماخو بدلاي

لبسي من مسيل الدمع بدلاي

وين الگه اليمر و ايحن عليه
***

عيني امن الدمع صارة حتم طي

لبن داوود چي گالو حتم طي

اريد اصعد علي اسجاده حتم طي

هوه المرني و زور البي حميه
***

العشنه بل وجل منه خيانه

والف مره الحذر گتلك خيانه

عليمن منهم اتمرنه خيانه

الربع موش الربع هما التيه
***

وحگ من مرسمه السابع وصلفه

يتم كلمن مشه اعلي الحگ وصلفه

تجد عين اشكثر وكحه وصلفه

علامتهه   البچي و فرحه سويه
***

چثيره اسهام من دهري لكتفاي

وگل خدي ابدمع تغرگ لكتفاي

غسلت ايديه من يسري لكتفاي

والو اسبح اظن هم حگ اليه

***

فقير العگله مستغني كشخبل

سلف يبگه ويظل حچيه كشخبل

حليب مو لبس يكشخ كشخبل

فهم والسانه ينطق بل وعيه
***

عسر دنياي گص گلبي وسحله

وهدم مبني الصبر مني وسحله

هويت اببحر بي كوسي وسحله

ذيابه اتاني حصتهه امن اديه
***

اشفعل بيه غدرهل ناس موسي

بلا يدرونه گلبي الساء موسي

وين الگه عصي وباعجاز موسي

و افتح كل گلب محقد عليه
***

علي گلبي السرور ابعيد مادن

والاجروح ابلظاهن ليل مادن

هظيمه للكرامه اچفوف مادن

گبل بيهن نسد للجود فيه
***

غلط منه اليگول الدهر يونس

اذا طبعه ايغدر كليوم يونس

فرد حلگ البلع تدرون يونس

وانه احلوگ ابلعتني ابغيرحيه
***

صفه المدرع بل امخالب بواوي

سبب يوم العليه يامر بواوي

هظيمه الاسد يتنخه بواوي

يبو ارويشد يگله الحگ عليه
***

اناس الچان بس خلگي ينسهام

ابرحوني و من نويتهم ينسهام

اصبر عل   گلب رايد ينسهام

طحت انه   وقده ايصبر عليه
***

انسف اهموم و اطحنهن براحاي

وصرت الهم لهم بيهن براحاي

ردت يوم الگه من عمري براحاي

لچن حتي الحلم هم نار ليه
***

علي حل الحزن وانشد شحل بل

هنه وتاه الفكر لا بل شحل بل

ضرع البي يسر ماكد شحل بل

يبسلي اسنين و امعسر عليه
***

الدهر لاحبابي كثره اسيوف حدهه

و جفاهم بل تلب هل روح حدهه

ردت   خوه مثلهم موش حدهه

ركبه   وبل ضنك تنگطع هيه
***

جفه الطيبين هد ركني وعتبل

دليل ومن مهل عيني وعتبل

الي ماظن تصح ولحه وعتبل

جفوني واحچي كل مامر عليه
***

ابكثر مبچاي احولب هم وجرما

ولا ادري اشذنب گلبي وجرما

اللهي كل بله ابليني وجرما

اريد و لا ذليل ايعيل بيه
***

رحل ذاك الي خوه وطيب يملاك

وظل شوم الي من تنخاه يملاك

يگلبي عود هم ترتاح يملاك

و سعيد اتصير بايام البجيه
***

اسنين ابچي وتفيض ابحوربلداي

وكل لحظه اغوصن غوص بلداي

غلط من گال ابيع ابرخص بلداي

ابيع امي الحنونه اشلون بيه
***

انهظمنه وبل مئاسي ياركبنه

لچن ذل ما حملنه ياركبنه

نگصن    لو تثنن ياركبنه

عدي الباري اله الكل بريه
***

ابتهيلك   زيد يا گلبي مداوين

وعثم جرحك واله احبابك مداوين

گبل يوم ابجمر نلعب مداوين

عجب هسه نشب ابكاس ميه
***

لا    تتعب   تدور ابليل بنهار

تجدني ابمسبح الدمعاة بنهار

گبل لا شخصك الينهار بنهار

لون اتطيح طايح عل وطيه
***

اخويصبحلي كل عربي ونخلا

ولا محتاج اهز منخل ونخلا

في نخلي يفي اعليه ونخلا

ستر يبگه ويفي دايم عليه
***

يروحي    اردود   ويايه     لجيتي

ودليلي من   كثر   فهوچ لجيتي

عسه ابهالدنيه كون انتي لجيتي

و لا     واحد يعدچ روح   بيه

***
كثيره اجروح ما زلتن تعدن

يديه و عل بكان اهنه تعدن

اظعون الفرح ما وگفن تعدن

وناخ الحزن بهمومه عليه
***

ابريجي ما ضگت مره من احلا

گفل يسري العسر بيده من احلا

يا كسر البگه و گلبي من احلا

وشفت من كل جرح قصه واذيه
***

سهم شرهه خطه الگلبي وفاته

واذا لاح اشنفعني اسفي وفاته

اللذي   مكروه لو ميت وفاته

فرح تصبح علي واتم   هنيه
***

الوكت سداده لي شلهم وعبهم

ومن يوم الوعه گلبي   وعبهم

الحسبت اعليه طحت يمه وعبهم

بدل ميشيل   ذب حمله عليه
***

اخلص   روحي من حيره بحيره

اطيح و   دمعي يعملي بحيره

الحسبتي اعليه عدوامربي بحيره

و دروس املغنه من ايهد عليه
***

حسبتي ابحملي لو يوگع تگلبه

واذا گلبي وگلب گلبي ان تگلبه

اشو صرت الحمل نفسك لبه

وگبل كل الشماته اتعيل بيه

***
اشكثر باچي الاسه روحي وتاهل

وگلبي الحائز الكل هم وتاهل

خوفي ابشيبي لو مرني وتاهل

فكر يا طيب الگه ايحن عليه
الشاعر هادي الامغيطي

الشاعرهادی الامغیطی(البوغبیش)ابوذيات

مطالب مشابه :

الشاعرمجیدالبوغبیش/هوسه

الشاعرسرتیب الباوی/هوسات

الشاعرهادی الامغیطی(البوغبیش)ابوذیه/اماني

الشاعراحمدالبوصبيح ال طحمه\ابوذيات\حينهه و عزلهه

چند نوحه از دیوان کلامی

الشاعرهادی الامغیطی(البوغبیش)ابوذيات

شعر ترکی _حاج ولی ا... کلامی زنجانی _

خدايا! نگذار نقاب منافق و بيطرف بر چهره مان افتد